إِبْقَ دِيَمة ضَاحِكْ بَاشِشْ: علي الدوعاجي

يقول علي الدوعاجي في واحد من أزجاله
:
إذا إنت تخمم و تمشي *** زلقت و طحت وسط طرنشي
لقيت عود في خدك محشي *** ما هي عينك ما خرجتشي؟
إبقى ديمة ضاحك باشش
ما يسالش
نكملو على هالمعنى
إذا إنت تحب تتكلم *** يا ما فمك ديمة مكمم
تجيك صكة فيه تهردم *** ماهي زروصك ما طاحتشي؟
إبق ديمة ضاحك باشش
ما يسالش
إذا إنت تحب تجنح *** و مكتوبك منقوب امكلح
يجيك مقص فيك يفلـّح *** ماهي ركايبك ما تحشتشي؟
إبق ديمة ضاحك باشش
ما يسالش
إذا كان تحب اتعبّر *** عندك راي و تحب اتنبّر
ثمة جماعة عليك تخبّر *** ماو رقبتك ما تقصتشي؟
إبق ديمة ضاحك باشش
ما يسالش
فيبالك عندك ما تقول *** و كلامك باهي و معقول
توللي غبي ومهبول *** ما هو مخّك ما اتطرشقشي؟
إبق ديمة ضاحك باشش
ما يسالش
تسحايب روحك عرّيف *** قاري و ضامر عندك نيف
يجي اللي يـ..رالك في الكيف *** توللي بهيم وما تفهمشي
يلزم تبقى ضاحك باشش
ما يسالش
فيبالك قافز و فهامة *** قفزت بكعبة حاجة ضخامة
تطلع بوجادي تترامى *** ماو سروالك ما تخرخطشي؟
إبق ديمة ضاحك باشش
ما يسالش